zulmat-kadon men kal jo shua-e-sahar ga.i
tariki-e-hayat yakayak ubhar ga.i
nazzara-e-jamal ki fursat kahan mili
pahli nazar nazar ki hadon se guzar ga.i
iz.har-e-iltifat ke baad un ki be-ruḳhi
ik rang aur naqsh-e-tamanna men bhar ga.i
zauq-e-junun o jazba-e-bebak kya mile
viran ho ke bhi miri duniya sanvar ga.i
ab daur-e-karsazi-e-vahshat nahin raha
ab arzu-e-lazzat-e-raqs-e-sharar ga.i
ik daagh bhi jabin pe meri aa gaya to kya
shoḳhi to un ke naqsh-e-qadam ki ubhar ga.i
taare se jhilmilate hain mizhgan-e-yar par
shayad nigah-e-yas bhi kuchh kaam kar ga.i
tum ne to ik karam hi kiya haal puchh kar
ab jo guzar ga.i mire dil par guzar ga.i
jalve hue jo aam to tab-e-nazar na thi
parde paḌe hue the jahan tak nazar ga.i
saara qusur us nigah-e-fitna-ju ka tha
lekin bala nigah-e-tamanna ke sar ga.i
Leave a Reply