Sahraon Ke Dost the Hum KHud-Arai Se KHatm Hue

sahraon ke dost the ham ḳhud-ara.i se ḳhatm hue

uupar uupar ḳhaak uḌaa.i gahra.i se ḳhatm hue

virana bhi ham the ḳhamoshi bhi ham the dil bhi ham

yaksui se ishq kiya aur yakta.i se ḳhatm hue

dariya daldal parbat jangal andar tak aa pahunche the

isi basti ke rahne vaale tanha.i se ḳhatm hue

kitni ankhen thiin jo apni bina.i men Duub ga.iin

kitne manzar the jo apni pahna.i se ḳhatm hue

‘adil’ is rahdari se vabasta kuchh gul-daste the

ruk ruk kar baḌhne valon ki paspa.i se ḳhatm hue