Ghayas Mateen
barish hogi to barish men donon mil kar bhigenge
ret pe ek musafir ka ghar aur samundar bhigenge
achchha main haara tum jiite aage ki ik baat suno
ab ke baras jab barish hogi soch samajh kar bhigenge
dhuup ka ik TukḌa kyuun mere sar par saaya karta hai
kya mujh ko manzar se haTa kar saare manzar bhigenge
kaghaz ki ik kashti le kar barish men kyuun nikle ho
bhule-bisre bachpan ki yadon ke paikar bhigenge
achchhe logon ki basti men tum kyuun rahne aa.e ho
yaan honTon par phuul khilenge ḳhuun men ḳhanjar bhigenge
us din ki jab barish hogi kaun bachega ham-safaro
phuul parind charagh jazire kankar patthar bhigenge
ik fanus hai jis men apni ruuh ‘matin’ sulagti hai
bhigna jab Thahra to usi fanus ke andar bhigenge
Leave a Reply