Ibrahim Ashk
main kab rahin-e-reg-e-bayaban-e-yas tha
sad-ḳhema-e-bahar mire aas paas tha
toḌa hai bar-ha mujhe dil ki shikast ne
chehra magar zara bhi na mera udaas tha
sahra-e-jan ki dhuup men thiin vahshaten bahut
lekin na mera azm kahin bad-havas tha
ye aur baat hai ki barhana thi zindagi
maujud phir bhi mere badan par libas tha
main ne har ek lamhe ko chaha hai TuuT kar
tha zindagi-parast mohabbat-shanas tha
mausam kuchh aa.e aise bhi shahr-e-ḳhayal men
mujh ko na jin ka ilm na koi qayas tha
fikr-e-suḳhan hi ‘ashk’ hai zauq-e-amal mira
is ke siva na kar-e-jahan koi raas tha
Leave a Reply