Hayat-O-Kaenat Par Kitab Likh Rahe the Hum

hayat-o-ka.enat par kitab likh rahe the ham

jahan jahan savab tha azaab likh rahe the ham

hamari tishnagi ka gham raqam tha mauj mauj par

samundaron ke jism par sarab likh rahe the ham

saval tha ki justuju aziim hai ki aarzu

so yuun hua ki umr bhar javab likh rahe the ham

sulagte dasht, ret aur babul the har ek su

nagar nagar, gali gali gulab likh rahe the ham

zamin ruk ke chal paḌi, charagh bujh ke jal ga.e

ki jab adhure ḳhvabon ka hisab likh rahe the ham

mujhe batana zindagi vo kaun si ghaḌi thi jab

ḳhud apne apne vaste azaab likh rahe the ham

chamak uTha har ek pal, mahak uThe qalam davat

kisi ke naam dil ka intisab likh rahe the ham