Bano Tahira Sayeed
ḳhud-faramoshi men ḳhayal kahan
main kahan hasrat-e-jamal kahan
na vo aansu hain aur na vo aahen
ab vo agla sa apna haal kahan
dil-e-vahshi ne sar uThaya hai
dur-andeshi-e-ma.al kahan
gham-e-duniya men sar hai sargardan
ab vo nairangi-e-ḳhayal kahan
ahd-e-rafta ko bhulna achchha
vo zamana vo mah-o-sal kahan
ho shikayat kisi se na-mumkin
ye jasarat kahan majal kahan
kis tarah dastan-e-gham kahe
koi pursan-e-arz-e-hal kahan
Leave a Reply