tanha nahin huun gar dil-e-divana saath hai
vo harzah-gard huun ki pari-ḳhana saath hai
hangama ik pari ki savari ka dekhna
kya dhuum hai ki saikḌon divana saath hai
dil men hain laakh tarah ke hiile bhare hue
phir mashvara ko a.ina o shana saath hai
roz-e-siyah men saath koi de to janiye
jab tak farogh-e-sham.a hai parvana saath hai
deta nahin hai saath tahi-dast ka koi
jab tak ki mai hai shishe men paimana saath hai
sikha huun mai-kade men tariq-e-farotani
jab tak ki sar hai sajda-e-shukrana saath hai
jo be-basar hain DhunDte phirte hain duur duur
aur har qadam pe jalva-e-janana saath hai
kya ḳhauf ho hamen zan-e-duniya ke makr ka
apni madad ko himmat-e-mardana saath hai
gham ki kitab se dil-e-sad-para kam nahin
jis bazm men ga.e yahi afsana saath hai
manind-e-gard-bad huun ḳhana-ba-dosh main
sahra men huun magar mira kashana saath hai
Leave a Reply