agar is khel men ab vo bhi shamil hone vaala hai
to apna kaam pahle se bhi mushkil hone vaala hai
hava shakhon men rukne aur ulajhne ko hai is lamhe
guzarte badalon men chand haail hone vaala hai
asar ab aur kya hona tha us jan-e-taghaful par
jo pahle besh o kam tha vo bhi zaail hone vaala hai
ziyada naaz ab kya kijiye josh-e-javani par
ki ye tufan bhi rafta rafta sahil hone vaala hai
hamin se koi koshish ho na paai kargar varna
har ik naqis yahan ka pir-e-kamil hone vaala hai
haqiqat men bahut kuchh khone vaale hain ye sada-dil
jo ye samjhe hue hain un ko hasil hone vaala hai
hamare hal-maston ko khabar hone se pahle hi
yahan par aur hi kuchh rang-e-mahfil hone vaala hai
chalo is marhale par hi koi tadbir kar dekho
vagarna shahr men paani to dakhil hone vaala hai
‘zafar’ kuchh aur hi ab shoabada dikhlaiye varna
ye dava-e-sukhan-dani to batil hone vaala hai
Leave a Reply