Poet
mai-e-gul-gun ke jo shishe men pari rahti hai
chash-maston men ajab jalvagari rahti hai
hai phandit ek vo banka ki laḌe jab tak aankh
mardumak panja-e-mizhgan men bhari rahti hai
baagh men jab vo gul-e-taza-bahar aata hai
bu-e-gul phir to hava par hi dhari rahti hai
naala bulbul hai chaman-zar hai dil daghon se
aah ta-sub.h nasim-e-sahari rahti hai
mohtasib duḳhtar-e-raz ham se jo tu aaj mila.e
bazm-e-maston men tiri mo’tabari rahti hai
saltanat faqr ki jin ko hi nahin pesh-e-nigah
kauḌi aur ashrafi yaksan-nazari rahti hai
lab-o-chashm apne hain ik alam-e-ḳhushki-o-tari
ishq men saltanat-e-bahr-o-bahri rahti hai
ashk-bari se gham-o-dard ki kheti-baḌi
lahlahi si nazar aati hai hari rahti hai
ru tira kuhl basar ho na use to be-vaj.h
chashm men aa.ine ke be-basari rahti hai
aabru paati thi ḳhushki ba-kamal istighna
ab-e-dariya ke na hone men tari rahti hai
tosha-ḳhana hai tira gumbad-e-gardun jis men
mehr-o-mah se tiri dastar zari rahti hai
hai jo aghyar ke har dam ki tiri amad-o-shud
jism men jaan hamari safari rahti hai
din-o-dil bikte hain hote hain gham-e-dard ḳharid
tire kuche men lagi ik guzri rahti hai
be-nishan zaḳhm se us tir-e-nigah ke dil men
dard rahta hai na paikan na sari rahti hai
dil ko bhi Dubti kyunkar na nazar aa.e ‘muhib’
kashti-e-chashm to paani se bhari rahti hai
Leave a Reply