Dil Apne Ranj-O-Gham Se Jam-E-Jahan-Numa Tha

dil apne ranj-o-gham se jam-e-jahan-numa tha

ab aap hi bata.en achchha tha ya bura tha

sahra tha ya chaman tha jaane vahi ki kya tha

is dil ki intiha hai jo muddaton jala tha

taḌpun tu raaz kholun sanblun to ishq na-ḳhush

jis haal ko main samjha achchha vahi bura tha

puchha na zindagi men yuun to kisi ne aa kar

marne ke ba.ad jo tha vo mujh ko puchhta tha

shab ko miri sada.en mujh tak palaT ke aa.iin

nalon ki kya ḳhata thi jab band rasta tha

manzil pe jab gira tha thak kar to main ne dekha

qissa mira zaban-e-alam pe chal raha tha

jan-e-hazin nikalti sham-e-firaq kyuun kar

vo raat thi andheri rasta na sujhta tha

meri taraf chale tum jab jankani men tha main

duniya hai ek aata tha ek ja raha tha

ik tarah ki musibat hoti to jhel lete

har shab na.i zamin thi har din falak naya tha

afsos hai ki umr-e-fani ne ḳhatm ho kar

mujh ko vahi bataya jis ko main janta tha

DhunDengi ba.ad mere mujh ko charagh le kar

vo mahfilen ki jin men ‘saqib’ ghazal-sara tha