poet

Jis Tarah Do-Jahan Mein Khuda Ka Nahin Sharik

jis tarah do-jahan men khuda ka nahin sharik

tere jamal men nahin koi hasin sharik

main bhi tira fidai huun mujh pe bhi rahm kha

jab tak hai is guman men kuchh kuchh yaqin sharik

us ke sitam hi kam hain jo auron ka naam luun

hai asman sharik na is men zamin sharik

roz-e-jaza ummid hai sab ko saza mile

iqdam-e-qatl men hain mire sab hasin sharik

ai badr tera daava-e-yaktai sab ghalat

jumla sifat men hai tire vo jabin sharik

sach puchhiye to jan-e-jahan mere qatl men

tirchhi nazar ke saath hi chin-e-jabin sharik

vaaiz tu bagh-e-husn ki ik baar sair kar

mumkin hai dilkashi men ho khuld-e-barin sharik

kya vajh tere zulm-o-sitam men maza nahin

ai daur-e-charkh aaj vo shayad nahin sharik

bheja payam-e-jalsa to andaz se kaha

arsa hua ki ham nahin hote kahin sharik

‘parvin’ ghalat hai un ko samajhna juda juda

hain jism-o-jan ki tarah se duniya-o-din sharik

More Poems

Leave a Comment