kis zaban se shikva-e-jaur-e-sitam-ara karen
jis ko achchha kah chuke us ki bura.i kya karen
un se jab puchha gaya bismil tumhare kya karen
hans ke bole zaḳhm-e-dil dekha karen roya karen
ho ke ghash jalve se naql-e-hazrat-e-musa karen
aap agar parda uTha bhi den to ham parda karen
husn se va.ada-ḳhilafi ishq se tauba karen
diin ke bhi hon bure duniya ko bhi rusva karen
kam se kam aisi to kuchh tadbir kar ai jazb-e-ishq
vo hamen dekhen na dekhen ham unhen dekha karen
ik zamana ho raha hai ishq men ham se ḳhilaf
kis ke kis ke dil men dil Dalen ilahi kya karen
har taraf zindan ki divaron pe hai tasvir-e-dost
ab jidhar chahen asiran-e-sitam sajda karen
vaah kya achchha taqaza vaah kya insaf hai
dard to den aap aur tasir ham paida karen
hazrat-e-‘manzar’ nahin hain va.izo is rang ke
aaj mai-ḳhvari karen kal baiTh kar tauba karen
Leave a Reply