ḳhushbu badan ki ḳhali samundar havaon ke
kyuun chheḌte hain ham ko payambar sadaon ke
dekhi na jaa.e ham se pareshan barahnagi
chunte hain apne jism men patthar ridaon ke
phir buund buund Tapki hamare badan se dhuup
phir aks aks bikhre hain manzar fazaon ke
ye aur baat apni hi tah tak na ja sake
utre the chand par bhi shanavar ḳhalaon ke
tapte rahe hain ḳhamushi ka zahr umr-bhar
shayad vo jante the muqaddar duaon ke
‘iraj’ sada-e-rang mahakne lagi hava
qaus-e-quzah ne khol diye par ghaTaon ke
Leave a Reply