etakaf men zahid munh chhupa.e baiTha hai
ghaliban zamane se maat khaa.e baiTha hai
va.e-ashiq-e-nadan ka.enat ye teri
ik shikasta shishe ko dil bana.e baiTha hai
taliban-e-did un ke dhuup dhuup phirte hain
ghair un ke kuche men saa.e saa.e baiTha hai
is taraf bhi ai sahab iltifat-e-yak-mizhgan
ik gharib mahfil men sar jhuka.e baiTha hai
dur-bash ai gulchin va hai dida-e-nargis
aaj har gul-e-nazuk ḳhaar khaa.e baiTha hai
kyuun suna nahin deta faisla muqaddar ka
nama-bar mire aage ḳhat chhupa.e baiTha hai
sub.h ki hava un se sirf itna kah dena
koi sham.a ki ab tak lau baḌha.e baiTha hai
Leave a Reply