Jagat Mohan Lal Ravan
yunhi gar har saans men thoḌi kami ho ja.egi
ḳhatm rafta rafta ik din zindagi ho ja.egi
dekhne vaale faqat tasvir-e-zahir par na ja
har nafas ke saath duniya dusri ho ja.egi
gar yahi fasl-e-junun-za hai yahi abr-e-bahar
azmat-e-tauba nisar-e-mai-kashi ho ja.egi
marg-e-be-hangam kahte hain jise aaj ahl-e-dard
kal yahi surat badal kar zindagi ho ja.egi
zikr hai zindan men vo gulzar par bijli giri
aaj mere ashiyan men raushni ho ja.egi
sajda gah-e-am par sajde se kuchh hasil nahin
muft aluda jabin-e-bandagi ho ja.egi
ḳhatm hai shab chehra-e-mashriq se uThti hai naqab
dam-zadan men raushni hi raushni ho ja.egi
muttasil hain zof o quvvat ki haden haan hoshyar
varna is tark-e-ḳhudi men ḳhud-kushi ho ja.egi
zaḳhm bhi taaza hai aur dil bhi nahin manus-e-dard
rafta rafta yunhi aadat sabr ki ho ja.egi
sham.a sa jab shaam hi se hai gudaz-e-dil ‘ravan’
sub.h tak kya jaane kya halat tiri ho ja.egi
Leave a Reply