KHud Mujhko Mere Dast-E-Kaman-Gir Se Mila

ḳhud mujh ko mere dast-e-kamāñ-gīr se milā

jo zaḳhm bhī milā hai usī tiir se milā

tujh ko ḳhabar bhī hai mire inkār kā javāb

teġh-o-sinān-o-ḳhanjar-o-shamshīr se milā

gum ho gayā thā maiñ kahīñ dasht-e-vajūd meñ

maiñ apne ism-e-zāt kī tasḳhīr se milā

milne kī kuchh ḳhushī na bichhaḌne kā ḳhauf hai

ai mirī jaan tū baḌī tāḳhīr se milā

ai ramz-e-āgahī maiñ tujhe ḳhud pe vā karūñ

vahshat ko mere paañv kī zanjīr se milā

dariyā tamām tishna laboñ kī hai milkiyat

is mumlikat ko pyaas kī jāgīr se milā

jo ḳhvāb merī chashm-e-zarūrat ne kho diyā

vo ḳhvāb mere ḳhvāb kī ta.abīr se milā

‘shāhid’ mire mizāj kī āshuftagī na dekh

merī udāsiyoñ kā nasab ‘mīr’ se milā

Leave a Comment