itna bhi ho na zauq-e-tajassus nigah men
haa.il rahen ḳhud aap hamin apni raah men
hone ko kya nahin hai tumhari nigah men
lekin vo ek chiiz jo hoti hai aah men
tauba ki rahaten nahin mere gunah men
kis darja aa ga.i hai bulandi nigah men
halanki manzilen bhi na.i azm bhi naya
milte hain mere naqsh-e-qadam mujh ko raah men
bas nuqta-e-nigah badalne ki der thi
ab mutma.in huun zindagi-e-ashk-o-ah men
dil ko nashat-e-gham se bhi rakhte hain duur ham
manzil pe yuun khaḌe hain ki jaise hon raah men
tum ne to mujh ko apni nazar se gira diya
main ho gaya buland ḳhud apni nigah men
Leave a Reply