kis ki ankhon ki hidayat se mujhe dekhta hai
a.ina apni firasat se mujhe dekhta hai
jab se utre hain mire dil pe ye alam-e-zamin
asman jhuk ke rifaqat se mujhe dekhta hai
main gunahgar huun ankhon men abhi tak apni
jaane vo kis ki niyabat se mujhe dekhta hai
ma.il-e-raqs nahin paanv men zanjir nahin
phir bhi zindan hai ki vahshat se mujhe dekhta hai
ek din Daali thi buniyad mashaqqat ki yahan
ab ye sahra bhi mohabbat se mujhe dekhta hai
dil ki avaz pe nikla tha baghavat ke liye
shahr ka shahr himayat se mujhe dekhta hai
raushni chha.i hui rahti hai ab mujh pe ‘taraz’
koi to hai jo inayat se mujhe dekhta hai
Leave a Reply