chuur sadmon se ho baiid nahin
abgina hai dil hadid nahin
mai-kashi kya kare bhala zahid
maghfirat ki use umiid nahin
char-su hai andhera ankhon men
chaar din se jo us ki diid nahin
mere aage mili vo ghairon se
hai moharram mujhe ye iid nahin
qatl aalam hai tere abru par
koi talvar se shahid nahin
apne dil se mujhe iradat hai
main kisi piir ka murid nahin
dil kisi se lage to kya chhute
koi is qufl ki kalid nahin
dekh le mar ke sakhti-e-sakrat
sadma-e-hijr se shadid nahin
vasl-e-janan hai segha-e-tohmat
ki mujarrad hain ham mazid nahin
ishq kya dard hai khudavanda
koi daru-dava mufid nahin
nahno-aqrab dalil hai ai ‘bahr’
yaar nazdik hai baiid nahin
Leave a Reply