tujh ko rakhti huun apni sochon men
phuul khilte hain kitne raston men
vapsi ki nahin hai raah koi
jhank baiThi huun teri ankhon men
main bhi un ka vajud lagne lagi
aise khoi huun khulte rangon men
jis tarah dhuup men shajar koi
apna lagta hai mujh ko ghairon men
vo bayan men to aa nahin sakta
is ko likkhun bhala kya lafzon men
niind meri to le gaya koi
kaise dekhun main is ko ḳhvabon men
asman vaale kuchh ḳhabar bhi hai
bhuuk ugne lagi hai kheton men
kaun sunta hai hal-e-dil ‘sayyad’
log bahre hain saare shahron men
Leave a Reply