Sahba Akhtar
mujhe mila vo baharon ki sarḳhushi ke saath
gul-o-saman se ziyada shaguftagi ke saath
vo raat chashma-e-zulmat par guzari thi
vo jab tulua hua mujh pe raushni ke saath
agar shu.ur na ho to bahisht hai duniya
baḌe azaab men guzri hai agahi ke saath
ye ittifaq hain sab raah ki masafat ke
chale kisi ke liye ja mile kisi ke saath
bura nahin hai magar hasb-e-tishnagi bhi kahan
suluk-e-shahd-laban meri tishnagi ke saath
faza men raqs hai ‘sahba’ hasin parindon ka
mujhe bhi hasrat-e-parvaz hai kisi ke saath
Leave a Reply