Azhar Hashmi
guzre hue lamhat ko ab DhunD raha huun
main apne muqaddar men ghazab DhunD raha huun
sajde ka sabab jaan ke shirin hai pareshan
farhad ne kah Daala ke rab DhunD raha huun
vo hain ki nibhane bhi lage vasl ke adab
main huun ki taghaful ka sabab DhunD raha huun
zalim mujhe phir saikḌon gham dene laga hai
main zindagi men ek ḳhushi jab DhunD raha huun
kyuun mujh ko suḳhnavar kaho pagal na kaho tum
har bazm men jo bazm-e-adab DhunD raha huun
azurda thi ghurbat men mire dost ki hijrat
kuchh main bhi pareshan huun arab DhunD raha huun
bas ek pata hi to mujhe yaad hai ‘az.har’
divana hai kya tujh ko main kab DhunD raha huun
Leave a Reply