asman se sahife utarte rahe
raushni se magar log Darte rahe
zindagi itni majbur si ho ga.i
hadse mujh ko ashkon se bharte rahe
jin ko sab kuchh mila un ko sab kuchh mila
jo bikharte rahe bas bikharte rahe
ban ga.iin jab bhi hamraz tanha.iyan
dil ki har baat ham dil se karte rahe
aate jaate nazar tujh se milti rahi
aa.ine zaviyon par ubharte rahe
chand yaden khilin aur murjha ga.iin
bas havaon men zarre bikharte rahe
aap aate rahe giit gaate rahe
ghar ke divar-o-dar bhi sanvarte rahe
kuchh bhi TuuTa nahin kuchh bhi bikhra nahin
hadse raston se guzarte rahe
kab kiya ham ne ‘usha’ kisi se gila
ḳhud men jiite rahe ḳhud men marte rahe
Leave a Reply