un ka vaada badal gaya hai
farda aansu men Dhal gaya hai
tanha.i se kuchh hui hain baten
tanha.i se dil bahal gaya hai
mamul-e-nazar vahi hai lekin
mafhum-e-nazar badal gaya hai
ruk ja ai karvan-e-imroz
maazi mera kuchal gaya hai
sahil pe nigah aankh vaalo
andha tufan machal gaya hai
saghar men sharab hai ki yaaro
angara koi pighal gaya hai
kis shoḳh nigah ka tasavvur
ruḳhsaron pe rang mal gaya hai
uTThega zarur ik na ik din
fitna filhal Tal gaya hai
saaqi tire mai-kade men aa kar
insan zara sambhal gaya hai
dekha ai inqilab tujh ko
tasvir ka ruḳh badal gaya hai
maghrib ke ufuq pe hai tabassum
suraj mashriq men Dhal gaya hai
vo aa.e hain yaad sham-e-hasrat
ya koi charagh jal gaya hai
manzil pe ‘shamim’ ko na paaya
shayad aage nikal gaya hai
Leave a Reply