zabt-e-gham se siva malal hua
ashk aa.e to ji bahal hua
phir se bujhne lagi hai bina.i
phir tiri diid ka saval hua
ik zara chand ke ubharne se
dekh suraj ka rang laal hua
kitne logon se milna-julna tha
ḳhud se milna bhi ab muhal hua
ham ne maazi ka har varaq palTa
ham ko har baat par malal hua
ham to Tuk dekhte rahe us ko
ra.egan lamha-e-visal hua
dard ash.ar men utar aaya
log kahne lage kamal hua
Leave a Reply