mujhe koi aisi ghazal suna ki main ro paḌun
zara jai jai vinti ke sur laga ki main ro paḌun
mire zabt tujh ko miri taraf se ye izn hai
mira aaj itna to dil dukha ki main ro paḌun
ye jo ḳhaak oḌh ke so rahi hai miri hansi
yuun bilak bilak ke use jaga ki main ro paḌun
mire ḳhud-kushi ke ḳhayal par mire haal par
miri bebasi mujhe yuun hansa ki main ro paḌun
tujhe ilm hai mira koi tere siva nahin
mujhe aa ke aise gale laga ki main ro paḌun
main jahan-e-surḳh men sabz-posh charagh huun
miri lau ko itna na aazma ki main ro paḌun
mira baḳht mera nasib tujh se chhupa nahin
mujhe de tu aisi koi dua ki main ro paḌun
ye jo ishq ki siyah shaal hai ye vabal hai
use yuun na dekh ke muskura ki main ro paḌun
miri ankhen ab bhi tiri gali men hain ḳhema-zan
faqat ek baar unhen dekh ja ki main ro paḌun
mira naam tu ne rakha tha ‘vasif’-e-na-tamam
isi naam se mujhe phir bula ki main ro paḌun
Leave a Reply