Afzal Allahabadi
ghazal ka husn hai aur giit ka shabab hai vo
nasha hai jis men sukhan ka vahi sharab hai vo
use na dekh mahakta hua gulab hai vo
na jaane kitni nigahon ka intikhab hai vo
misal mil na saki kaenat men us ki
javab us ka nahin koi la-javab hai vo
miri in ankhon ko tabir mil nahin paati
jise main dekhta rahta huun aisa khvab hai vo
na jaane kitne hijabon men vo chhupa hai magar
nigah-e-dil se jo dekhun to be-hijab hai vo
ujale apne luta kar vo duub jaega
hasin sub.h ka rakhshanda aftab hai vo
vo mujh se puchhne aaya hai mera haal ‘afzal’
jise bata na sakun dil men iztirab hai vo
Leave a Reply