Syed Amin Ashraf
suḳhan ki shab lahu hoti rahegi
kisi se guftugu hoti rahegi
vo suraj hai to ho nazdik-e-jan bhi
ye tabish char-su hoti rahegi
darida-damani hai be-kali se
isi se ye rafu hoti rahegi
koi ghuncha savar-e-kahkashan tha
ḳhabar ye ku-ba-ku hoti rahegi
main aksar sochta rahta huun kab tak
zamin be-abru hoti rahegi
samundar ke kinare mil rahe hain
ye duniya ab-ju hoti rahegi
ḳhazine ka.enati kam na honge
namud-e-justuju hoti rahegi
nihal-e-ishq afsurda na hoga
tamanna-e-numu hoti rahegi
na vo hoga na ham lekin ye duniya
haris-e-rang-o-bu hoti rahegi
Leave a Reply