hazar kufr hain ik chashm-e-parsa men tiri
bhari hui hai shararat ada ada men tiri
baqa ko apni mashiyyat tiri samajhta huun
miri hayat-e-qaza-kar hai raza men tiri
mire habib miri aḳhirat ke ai zamin
mire nasib ki jannat hai ḳhak-e-pa men tiri
ye kis maqam se tu ne ḳhitab farmaya
suni ga.i miri avaz bhi sada men tiri
ye soch kar na ‘munavar’ ne kuchh kiya shikva
vafa ki daad ka pahlu bhi hai jafa men tiri
Leave a Reply