Naseer Parwaz
main ek TuuTi hui zaat le ke aaya huun
badan pe taaza savalat le ke aaya huun
jahan se milti hai har shaḳhs ko mata-e-hayat
main us jagah se bhi ḳhairat le ke aaya huun
Thahar sakun to Thahar ja.un chal sakun to chalun
ajab shikasta se halat le ke aaya huun
bulandiyan bhi mira jism pastiyan bhi badan
na jaane kaise maqamat le ke aaya huun
mujhe yaqin nahin log aisa kahte hain
main apne saath kamalat le ke aaya huun
mire lahu se hui ḳhak-e-zindagi sairab
ghurur-e-azmat-e-sadat le ke aaya huun
jahan-e-sher-o-ghazal mere naam likh ‘parvaz’
gudaz-e-ramz-o-kinayat le ke aaya huun
Leave a Reply