Log Kahte Hain Ek Sada Hun Main

log kahte haiñ ik sadā huuñ maiñ

ḳhair ḳhud hī meñ gūñjtā huuñ maiñ

aañkh jaise ka.ī darīcha hai

aur andar se jhāñktā huuñ maiñ

tū ne chāhā thā gher le mujh ko

dekh bāhoñ meñ aa gayā huuñ maiñ

apne saa.e se pūchh letā huuñ

kyā tire saath chal rahā huuñ maiñ

terī bātoñ meñ ho gayā huuñ gum

apnī āvāz kho chukā huuñ maiñ

is kināre se us kināre tak

apnī manzil ko tāktā huuñ maiñ

us se ab kyā shikāyateñ hoñ asar

jis se fariyād kar rahā huuñ maiñ

Leave a Comment