Asad Raza
honTon pe us ke jumbish-e-inkar bhi nahin
ankhon men koi shoḳhi-e-iqrar bhi nahin
basti men koi munis-o-gham-ḳhvar bhi nahin
‘ghalib’ ka haa.e koi taraf-dar bhi nahin
kashti buri tarah hai bhanvar men phansi hui
lekin hamare haath men patvar bhi nahin
un ko saza.en di hain zamane ne barha
mulzim bhi jo nahin hain gunahgar bhi nahin
tohfa ajab diya hai chaman ko bahar ne
phulon ka zikr kya hai koi ḳhaar bhi nahin
shayad ta.alluqat men ab injimad hai
pahli si baat baat pe takrar bhi nahin
show-pis to bana diya halat ne ‘asad’
koi magar hamara ḳharidar bhi nahin
Leave a Reply