jab tak nigar-e-dasht ka siina dukha na tha
sahra men koi lala-e-sahra khila na tha
do jhilen us ki ankhon men lahra ke so gaiin
us vaqt meri umr ka dariya chadha na tha
jaagi na thiin nason men tamanna ki naginen
us gandumi sharab ko jab tak chakha na tha
dhunda karo jahan-e-tahayyur men umr bhar
vo chalti phirti chhanv hai main ne kaha na tha
ik bevafa ke samne aansu bahate ham
itna hamari aankh ka paani mara na tha
vo kaale hont jaam samajh kar chadha gae
vo aab jis se main ne vuzu tak kiya na tha
sab log apne apne khudaon ko laae the
ek ham aise the ki hamara khuda na tha
vo kaali ankhen shahr men mashhur thiin bahut
tab un pe mote shishon ka chashma chadha na tha
main sahib-e-ghazal tha hasinon ki bazm men
sar par ghanere baal the matha khula na tha