Lutf-Saman Itab-E-Yar Bhi Hai

lutf-saman itab-e-yar bhi hai

mahram-e-ishq sharmsar bhi hai

sust-paiman o be-niyaz sahi

husn tasvir-e-intizar bhi hai

kya kare vo nigah-e-lutf ki ishq

shadman bhi hai sogvar bhi hai

gulshan-e-ishq huun khizan meri

vajh-e-rangini-e-bahar bhi hai

uqda-e-ishq ko na tu samjha

yahi uqda kushud-e-kar bhi hai

apni taqdir apne haath men le

shamil-e-jabr ikhtiyar bhi hai

aap apna chadhav apna utaar

zindagi nashsha hai khumar bhi hai

un nigahon men hai shikayat si

ishq shayad jafa-shiar bhi hai

dil se hai duur bhi nigah tiri

dil ke andar hai dil ke paar bhi hai

sar-ba-sar gharq-e-nur ho lekin

zindagi iktisab-e-nar bhi hai

kaun targhib-e-hosh de ki junun

be-khabar bhi hai hoshiyar bhi hai

khalvat-e-husn-o-ishq bhi hai udaas

sard kuchh bazm-e-rozgar bhi hai

raaz us aankh ka nahin khulta

dil shakeba bhi be-qarar bhi hai

khud tujhe bhi hui na jin ki khabar

un jafaon ka kuchh shumar bhi hai

is men lakhon nizam-e-shamsi hain

yuun to dil tira-rozgar bhi hai

is ki zau us ki garmiyan mat puchh

zindagi nuur bhi hai naar bhi hai

ishq-e-hijran-nasib ka bhi hai dhyan

tire vaade ka e’tibar bhi hai

ishq hi se hain manzilen abad

karvan karvan pukar bhi hai

koi samjha use na dekh saka

nigah-e-shokh sharmsar bhi hai

us se chhut kar ye sochta huun ‘firaq’

is men kuchh apna ikhtiyar bhi hai