kuchh rup-nagar ka zikr karo kuchh rang-mahal ki baat karo
rangin faza hai mahfil ki rangin ghazal ki baat karo
rindon ko na ab Talon kal par rindon se na kal ki baat karo
tum aaj hamare saaqi ho tum aaj na halki baat karo
hai sub.h-e-banaras ruup us ka to sham-e-avadh gesu us ke
vo meri ghazal hai meri ghazal tum meri ghazal ki baat karo
taqrir ki lazzat be-ma.ani tahrir ki nudrat la-hasil
ye fikr-o-amal ki hai duniya kuchh fikr-o-amal ki baat karo
baiThe ho ‘aziz’ apne aise ahbab ki rangin mahfil men
tauba ke tasavvur se pahle iman ke ḳhalal ki baat karo
Leave a Reply