Imran Aami
zaḳhm ab tak vahi siine men liye phirta huun
kuufe valon ko madine men liye phirta huun
jaane kab kis ki zarurat mujhe paḌ jaa.e kahan
aag aur ḳhaak safine men liye phirta huun
ret ki tarah phisalte hain miri ankhon se
ḳhvab aise bhi ḳhazine men liye phirta huun
ek nakam mohabbat mira sarmaya hai
aur kya ḳhaak dafine men liye phirta huun
dil pe likkha hai kisi aur pari-zad ka naam
naqsh ik aur nagine men liye phirta huun
is liye sab se alag hai miri ḳhushbu ‘ami’
mushk-e-mazdur pasine men liye phirta huun
Leave a Reply