ji men hai ik din jhuum kar us shoḳh ko sajda karun
sajde se phir allah tak ik rasta paida karun
bas ho chuka ahl-e-jahan ab ye tamasha kab talak
kya chashm-e-zahir se mila kya dida-e-dil va karun
haan haan vo bazigar sahi miTTi ka ik paikar sahi
teri nazar se ham-nashin kaise use dekha karun
jaise kahin hai kuchh kami tasvir banti hi nahin
arz-e-hunar men kab talak kilk-e-guhar toḌa karun
us se yahi kahta huun vajib ehtiram-e-ishq hai
andar se ye ḳhvahish hai vo jaisa kahe vaisa karun
ye jhilmilata sa jahan gaahe ayaan gaahe nihan
Thahre to kuchh ma.alum ho dekhun to raaz ifsha karun
Leave a Reply