Parkash Fikri
zard peḌon pe shaam hai giryan
ji udasi ke dasht men hairan
nim-raushan siyahiyan har su
aur hava.en sukut par ḳhandan
Thahre paani ke sard shishe men
guzre mausam ke aks hain larzan
sab ke honTon pe jam ga.iin baten
sab ki ankhon men raat nauha-ḳhvan
rabt rishton ke rang hain phike
ḳhvab qisse kahaniyan be-jan
jo tha raste ki raushni ‘fikri’
vo bhi nazron se ho gaya pinhan
Leave a Reply