Poet
jo roen dard-e-dil se tilmila kar
to vo hansta hai kya kya khilkhila kar
yahi dekha ki uthvae gae bas
jo dekha tuk udhar ko aankh utha kar
bhala dekhen ye kin ankhon se kyuun ji
kisi ko dekhna ham ko dikha kar
khada rahne na den vo ab ki jo shakhs
uthate the maze ham ko bitha kar
gaya vo dil bhi pahlu se ki jis ko
kabhi rote the chhati se laga kar
chali jaati hai tu ai umr-e-rafta
ye ham ko kis musibat men phansa kar
khat aaya vaan se aisa jis se apna
navishta khuub samjhe ham padha kar
abhi ghar se nahin nikla vo tis par
chala ghar-bar ik aalam luta kar
diya dhadka use kuchh vasl men haae
bigadi baat gardun ne bana kar
mohabbat in dino jo ghat gai vaan
to kuchh paate nahin us paas ja kar
magar ham shauq ke ghalbe se har baar
khajil hote hain haath apna badha kar
nahin munh se nikalti us ke kuchh baat
kisi ne kya kaha ‘jurat’ se aa kar
Leave a Reply