dil mar chuka hai ab na masiha bana karo
ya hans paḌo ya haath uTha kar dua karo
ab husn ke mizaj se vaqif hua huun main
ik bhuul thi jo tum se kaha tha vafa karo
dil bhi sanam-parast nazar bhi sanam-parast
kis ki ada saho to kise rahnuma karo
jis se hujum-e-ghair men hoti hain chashmaken
us ajnabi nigah se bhi ashna karo
ik soz ik dhuan hai pas-e-parda-e-jamal
tum laakh sham-e-bazm-e-raqiban bana karo
qaa.em usi ki zaat se hai rabt-e-zindagi
ai dost ehtiram-e-dil-e-mubtala karo
taqrib-e-ishq hai ye dam-e-vapsin nahin
tum jaao apna farz-e-taghaful ada karo
vo bazm se nikal ke kahte hain ai ‘zahir’
jaao magar qarib-e-rag-e-jan raha karo
Leave a Reply