Kisi Apne Se Hoti Hai Na Begane Se Hoti Hai

Figar Unnavi

kisi apne se hoti hai na begane se hoti hai

jo ulfat ek divane ko divane se hoti hai

subu se jaam se miina se paimane se hoti hai

mohabbat mai se ho kar saare mai-ḳhane se hoti hai

koi qissa ho koi vaqi.a koi hikayat ho

tasalli dil ko dard-e-dil ke afsane se hoti hai

miri tauba se kah do vo bhi aa kar shauq se sun le

ajab avaz paida dal ke paimane se hoti hai

nazar se chhupne vaale dil se aḳhir kyuun nahin chhupte

ye kaisi be-hijabi a.ina-ḳhane se hoti hai

bahar-e-chand-roza se koi mange to kya mange

ḳhizan ko bhi nadamat haath phailane se hoti hai

ghaTa.en gham ki chhaT jaati hain un ke muskurane se

ki jaise sub.h paida raat Dhal jaane se hoti hai

‘figar’ ehsas-e-dil men har taraf kanTe hi kanTe hain

yahi taskin gulshan men bahar aane se hoti hai