shahr bezar rahguzar tanha
zindagi uTh chali kidhar tanha
meri rag-rag men dhuul raqsan hai
mujh men maujud hai khanDar tanha
dasht ki na-tamam rahon par
koi sathi hai to shajar tanha
teri aahaT saja ke palkon par
DhunDhti hai tujhe nazar tanha
ho ke be-nur raat kahla.i
chand ko DhunDhti sahar tanha
sang bhi dil bhi aur Thokar bhi
‘arsh’ tanha na ye safar tanha
Leave a Reply