parinde jhiil par ik rabt-e-ruhani men aa.e hain
kisi bichhḌe hue mausam ki hairani men aa.e hain
musalsal dhund halki raushni bhige hue manzar
ye kin barsi hui a.ankhon ki nigrani men aa.e hain
ka.i sahil yahan Duube hain aur girdab TuuTe hain
ka.i tufan is Thahre hue paani men aa.e hain
main jin lamhon ke saa.e men tumhare paas pahuncha huun
vo lamhe sajda ban kar meri peshani men aa.e hain
nazar bhar kar use dekho to yuun mahsus hota hai
hazaron rang ik chehre ki tabani men aa.e hain
Leave a Reply