jab mayassar hai ki shaghl-e-bada-o-mina karen
kyon gham-e-imroz kyon andesha-e-farda karen
qabil-e-tazir hon ham bhi agar shikva karen
un ko mashq-e-jaur karna hai bahut achchha karen
dil ye kahta hai unhen aThon pahar dekha karen
aah ai ehsas-e-nam-o-nang tujh ko kya karen
husn hai sargarm-e-jalva ishq hai be-tab-e-shauq
ab bata.e koi arbab-e-mohabbat kya karen
bas ki daman-gir hai namus-e-ulfat ka ḳhayal
hal-e-dil un ko suna aane ki surat kya karen
naama likh sakte nahin un ko bula sakte nahin
ya-ḳhuda dard-e-mohabbat ka mudava kya karen
al-madad ai marg raz-e-gham hua jaata hai faash
dil ko thamen dida-e-tar ko sambhalen kya karen
ho chali hai iltifat-andesh fitrat husn ki
vaqt hai ahl-e-mohabbat aur istighna karen
iltifat-e-saqi-e-mai-ḳhana hasil hai ‘rashid’
aaj bhi kyon ehtimam-e-hasrat-e-duniya karen
Leave a Reply