Poet
be-shak apne zeba.i par us ko naaz rahe
lekin shaam savere yaad aane se baaz rahe
ek muqaddas hasti ne ik roz dua ye ki
rab ki rahmat se duniya men tu mumtaz rahe
qatra qatra duuri de kar jis ne maar diya
apnon jaise us dushman ki umr daraz rahe
us ka dhyan kabhi na bhule dil men ho har pal
soch usi ko sochti jaa.e narm gudaz rahe
ek qadam ke saath pe us ki laraz ga.i avaz
saat janam tak ham jis jhuTe ki avaz rahe
duniya us ke saath ho lekin us ke dil men ham
saare jag men ham ko hasil ye e.ajaz rahe
us ne dekha ḳhush ho ke a.ina toḌ diya
barson apne aap se lekin ham naraz rahe
kabhi nahin aaya vo kah kar us ko janti huun
jhuTi aas ke us ke paas hamesh javaz rahe
Leave a Reply