qarya-e-intizar men umr ganva ke aa.e hain
ḳhak-ba-sar is dasht men ḳhaak uḌa ke aa.e hain
yaad hai tegh-e-be-ruḳhi yaad hai navak-e-sitam
bazm se teri ahl-e-dil ranj uTha ke aa.e hain
jurm thi sair-e-gulistan jurm tha jalva-ha-e-gul
jabr ke bavajud ham gasht laga ke aa.e hain
pahle bhi sar bahut kaTe pahle bhi ḳhuun bahut baha
ab ke magar azaab ke daur bala ke aa.e hain
raat ka koi pahar hai tez hava ka qahr hai
ḳhauf-zada dilon men sab harf dua ke aa.e hain
Leave a Reply