zindagi rain-basere ke siva kuchh bhi nahin
ye nafas umr ke phere ke siva kuchh bhi nahin
jise nadan ki boli men sadi kahte hain
vo ghaḌi shaam savere ke siva kuchh bhi nahin
dil kabhi shahr-e-sada-rang hua karta tha
ab to ujḌe hue Dere ke siva kuchh bhi nahin
haath men biin hai kanon ki lavon men baale
ye riya-kar sapere ke siva kuchh bhi nahin
saans ke lahriye jhonkon se phaTa jaata hai
jism kaghaz ke pharere ke siva kuchh bhi nahin
aaj insan ka chehra to hai suraj ki tarah
ruuh men ghor andhere ke siva kuchh bhi nahin
vaqt hi se hai sharaf dast-e-dua ko hasil
bandagi sanjh-savere ke siva kuchh bhi nahin
faqr maḳhdum hai laj-pal hai lakh-data hai
taaj be-rahm luTere ke siva kuchh bhi nahin
Leave a Reply