main apni jang men tan-e-tanha sharik tha
dushman ke saath saara zamana sharik tha
injir o shiir banTta phirta hai shahr men
kal tak jo meri nan-e-javin ka sharik tha
mere ḳhilaf hai vo gavahi men pesh pesh
mansuba-bandiyon men jo mera sharik tha
mere qisas ka bhi hua hai vo mudda.i
jo mere qatl men pas-e-parda sharik tha
kar-e-jahan men bhi vahi mera sharik hai
dukh-dard men jo lamha-ba-lamha sharik tha
kashti ke Dubne ka mujhe gham nahin magar
maujon ki saz-baz men dariya sharik tha
had ho ga.i thi ham se mohabbat men kufr ki
jaise ḳhuda-na-ḳhvasta vo la-sharik tha
’tishna’ ye tujh ko sang-e-malamat usi ke hain
pindar-e-ishq men jo ana ka sharik tha
Leave a Reply