Haidar Ali Aatish
ya-ali kah kar but-e-pindar toḌa chahiye
nafs-e-ammara ki gardan ko maroḌa chahiye
tang aa kar jism ko ai ruuh chhoḌa chahiye
tifl-tabaon ke liye miTTi ka ghoḌa chahiye
zulf ke saude men apne sar ko phoḌa chahiye
jab bala ka samna ho munh na moḌa chahiye
ghurti hai tum ko nargis aankh phoḌa chahiye
gul bahut hanste hain kaan un ke maroḌa chahiye
aj-kal hota hai apna ishq-e-pinhan ashkar
pak chuka hai ḳhuub ab phuTe ye phoḌa chahiye
mangta huun main ḳhuda se apne dil se dagh-e-ishq
badshah-e-husn ke sikke ka toḌa chahiye
un labon ke ishq ne hai jaise divana kiya
baḌ apni hai ik lalon ka joḌa chahiye
de raha hai gesu-e-mushkin saude ko jagah
kis ke aage ja ke apne sar ko phoḌa chahiye
bada-e-gul-gun ke shishe ka huun saa.il saqiya
saath kaifiyyat ke uḌta mujh ko ghoḌa chahiye
ye sada aati hai raftar-e-samand-e-umr se
vo bhi ghoḌa hai koi jis ko ki koḌa chahiye
qat.a miqraz-e-ḳhamoshi se zaban ko kijiye
qufl de kar ganj par miftah toḌa chahiye
apne divane ka dil le kar ye kahta hai vo tifl
ye khilauna hai isi qabil ki toḌa chahiye
zulfen ru-e-yar par be-vaj.h lahrati nahin
kuchh na kuchh zahr agle ye kaale ka joḌa chahiye
baghban se chhup ke gul-chini jo ki to kya kiya
aankh bulbul ki bacha kar phuul toḌa chahiye
fasl-e-gul men beḌiyan kaaTi hain mere paanv ki
haath men haddad ke sone ka toḌa chahiye
bagh-e-alam men yahi meri dua hai roz-o-shab
ḳhaar ḳhaar ishq-e-gul-e-ruḳhsar toḌa chahiye
ishq ki mushkil-pasandi se hua ye ashkar
ḳhubsurat ko ghurur-e-husn thoḌa chahiye
zamzame sun kar mire sayyad-e-gul-ru ne kaha
zab.h kiije aise bulbul ko na chhoḌa chahiye
piir ho ‘atish’ kafan ka samna hai an-qarib
tauba kiije daman-e-tar ko nichoḌa chahiye
Leave a Reply