Mohabbat Ka Zamana Yaad Aaya

Poet

mohabbat ka zamana yaad aaya

mujhe apna fasana yaad aaya

jabin ki shorishen allahu-akbar

phir un ka astana yaad aaya

vo rudad-e-alam phir yaad aa.i

tira aansu bahana yaad aaya

asiron ko qafas ki zindagi men

nasheman ka zamana yaad aaya

lab-e-gul ka tabassum kuchh na puchho

tumhara muskurana yaad aaya

vo aalam apni az-ḳhud-raftagi ka

vo un ka paas aana yaad aaya

gile shikve kahan tak un se ‘nudrat’

ye kab ka dostana yaad aaya